Насловот ме мачи долго време. Читам, слушам, гледам… Се разбранува работата околу фамозното плаќање преку интернет. Работејќи на разни веб решенија се судрувам со постојаното прашање од секој клиент: „И сега, како иде тоа? Како да продавам јас преку мојата веб страница? Што треба да направам?“. И тука почнува голготата, наречена „Зошто не може и како може а да е законски!“.

Во моментов законската регулатива не го овозможува тоа. Особено неизводливо е за правни лица. Доколку се работи за услуги, тогаш решение постои. Но, за продажба на роба кога една фирма ја поседува како предмет, на лагер, во магацин, како сопствена трговска стока, не постои решение. Слушам, читам, банките немале интерес! Требало да се инвестира во информативен систем кој чинел многу пари, па инвестицијата не била исплатлива! ТАКА Е! А и бизнис заедницата запнала да го реши овој проблем, да се воспостави конечно нормален тек на работите.

Ајде кратко резиме:

1. Речиси сите банки воспоставија е-banking решенија. Функционираат! За физички лица, бесплатно, за фирми месечна провизија. Додуша, за мене тотално некомерцијално и лаички поставени тарифници за услуги. Зошто? Нека ги укинат провизиите за e-banking плаќања, нека ги намалат провизиите за секој налог поединечно, и нека укинат пола од шалтерите по филијалите, па и филијали…Тогаш, мал дел од потребите за плаќање ќе се врши во кеш на шалтер.
2. Ако постојат e-banking решенија, што е толку проблем, истиот трансфер на податоци да се отвори за сите видови трансакции во и надвор од земјата? Немале решени безбедносни системи! Ајде де, голема инвестиција!
3. Банките велеле, нема да  има доволно трансакции, па затоа не можат да предвидат за колку време ќе се врати инвестицијата.
4. …

Основата на безготовинските транскации, а особено плаќањата преку интернет (веб), е мобилност, достапност, и особено, глобален пазар. Се повеќе фирми бараат веб решенија за продажба преку веб. Ако пазарот на македонските фирми се отвори, тогаш и размислувањата за продажбата ќе се сменат. Во најмала рака, ќе гледаат да направат најдобра промоција за да направат барем 10% поголема продажба преку оваа алатка. А тука паѓа во вода муабетот дека во Македонија има 2 мил. пазар, дека народов е скептик за користење на картички на интернет, дека нема навика за користење на картичка наместо купување со кеш…

Инвестицијата се исплати, но некој намерно кочи! Зошто намерно? Јас поим си немам. Се повеќе слушам дека луѓе порачуваат пица преку веб, и им доаѓа на врата за пола саат.  Секако, прво ќе ве побараат на контакт телефонот за да ја потврдите нарачката, да објасните каде да ви ја донесат… И кога ќе ви дојде плаќате во кеш.

Едвај чекам да дојде златниот момент и ова да работи кај нас. Кога? Во овој век сигурно, порано ли подоцна, небитно. Ќе не биде!